एमालेमा बोल्न नदिएको भन्दै विद्रोह गरेर बनेको नेकपा एसले आफ्नै नेतालाई लेख लेखेकै कारण स्पष्टीकरण सोधेको छ

तीन वर्षअघि नेकपा एमालेबाट विद्रोहगरी बनेको नेकपा एकीकृत समाजवादीको वेबसाइटमा 'पार्टी परिचय' पृष्ठमा पार्टी गठनको पृष्ठभूमिबारे भनिएको छ- "यो पार्टी तत्कालिन पार्टी नेकपा (एमाले) को नेतृत्व गुटमा देखिएको व्यक्तिवादी अहंकारवाद, निरंकुश एवम् स्वेच्छाचारी प्रवृत्ति, चरम गुटबन्दी, दक्षिणपन्थी अवसरवाद र विसर्जनवादका विरुद्ध विद्रोह गरेर गठन गरिएको पार्टी हो ।" 

तर यही पार्टीले नेतृत्वको आलोचना गरेको भन्दै एकजना जिम्मेवार नेतामाथि कारबाहीको डण्डा चलाएको छ । एक अनलाइनमा प्रकाशित लेखको विषयलाई लिएर नेकपा एकीकृत समाजवादीले आफ्नै पत्रकार संगठनका अध्यक्ष विश्वमणि सुवेदीलाई स्पष्टिकरण सोधेको हो ।

सुवेदीले नेपालप्रेस डट कममा एमालेका कबाडी र टपरे चिन्तनबाट कहाँ पुग्ला नेकपा एस? शीर्षकमा लेख लेखेका थिए । 

उक्त लेखमा अभिव्यक्त विचारलाई लिएर नेकपा एकीकृत समाजवादी केन्द्रीय कार्यालयको लेटरहेडमा सुवेदीलाई २४ घण्टे स्पष्टीकरण सोधिएको उनले फेसबुकमा सार्वजनिक गरेको पत्रअंशबाट थाहा हुन्छ । 

"पेशागत हक, अधिकारका कुरा पार्टी प्रणालीमा आधारित भएर गरौं भनेर, अनि सत्य र निष्ठाको पक्षमा माधव नेपाल उभिए भनेर चलाएको 'विद्रोह'मा पनि आखिर चाकर र दासकै खोजी हुने रहेछ", आफूलाई स्पष्टीकरण सोधिएको जानकारीसहित सुवेदीले फेसबुकमा असन्तुष्टि पोखेका छन् ।  

सुवेदीलाई सोधिएको स्पष्टीकरणको बेहोरा । 

सुवेदी २०७८ भाद्र २ गते नेकपा एमालेबाट फुटेर बनेको माधव नेपालको नेतृत्वको नेकपा एकीकृत समाजवादीका प्रचार विभाग पूर्वसदस्य एवं पूर्व केन्द्रीय परिषद सदस्य हुन् । हाल उनी नेकपा एसको पत्रकारहरूको समाजवादी प्रेस संगठनका अध्यक्ष छन् । 

तीन वर्षअघि नेकपा एमालेमा अभिव्यक्ति स्वतन्त्रता नभएको र चाकरी प्रवृत्ति हावी भएको भन्दै विद्रोह गरेको स्मरण गर्दै सुवेदीले अहिले आफ्नै पार्टीले विचार अभिव्यक्त गरेकै कारण स्पष्टिकरण सोधेको भन्दै आश्चर्य व्यक्त गरेका छन् ।

लेखमा सुवेदीले नेकपा एसका नेताहरूको वर्तमान राजनीतिक अवस्थाको विश्लेषण गर्दै पार्टीभित्रका केही नेताहरूलाई 'कबाडी'को संज्ञा दिएका छन् । साथै, कांग्रेस र माओवादी केन्द्रले नेकपा एसलाई केवल मोहराको रूपमा प्रयोग गरिरहेको टिप्पणी पनि उनले लेखमा गरेका छन् ।

"अब म कुन मुखले भनौं, त्यहाँ दास छन्, यहाँ विवेक र चेतनाले लागेका मान्छे छौं भनेर?" सुवेदीले फेसबुकमा प्रश्न गरेका छन्, "त्यहाँ चाकर छन्, दास छन्। लेख्न र बोल्न बर्जित छ भनेर विद्रोह गर्‍यौं, तर आज आफ्नै पार्टीले लेखेबापत स्पष्टिकरण सोधेको छ।"

सुवेदीले आफू गलतलाई गलत र सहीलाई सही भन्ने क्रममा निरन्तर लेखिरहने बताएका छन् । पार्टीभित्र विचार र अभिव्यक्ति स्वतन्त्रतामाथिको यो कारबाहीले नेकपा एसको आन्तरिक लोकतन्त्रमाथि प्रश्न उठेको छ । 

केही समयअघि नेकपा एमालेले विवादित व्यापारीबाट दान लिएको जग्गा फिर्ताको माग गर्ने नेताहरूलाई पार्टीबाट निस्कासन गर्नेसम्मका कारबाही गरेको थियो । एमालेमा बोल्नेहरूमाथि ओलीको डण्डा