अन्तर्राष्ट्रिय महिला दिवस (८ मार्च) को पूर्वसन्ध्यामा अनलाइनखबर डटकमले प्रकाशित गरेको 'नेपालका ५० प्रभावशाली महिला' को सूचीमा दुई अग्रणी पत्रकार समावेश छन् । राजनीति, समाज, कला/साहित्य, संस्कृति, युवा तथा खेलकुद, ज्ञान विज्ञान, उद्यम र डायस्पोरा क्षेत्रका प्रतिनिधिमूलक ५० महिलाहरूको यो सूचीमा नेपाल पत्रकार महासंघकी अध्यक्ष निर्मला शर्मा र अन्तर्राष्ट्रिय ख्याति प्राप्त डकुमेन्ट्री फिल्ममेकर सुविना श्रेष्ठ रहेका छन् ।

१. निर्मला शर्मा

नेपाल पत्रकार महासंघको सातदशक लामो इतिहासमा पहिलोपटक महिला नेतृत्वमा पुगेकी निर्मला शर्माको पत्रकारिता यात्रा २०५३ सालबाट श्री सगरमाथा दैनिकमा अनुवादकका रूपमा सुरु भएको थियो । संसदीय रिपोर्टिङको जिम्मेवारीबाट शर्माले पत्रकारिता सुरु गरेकी थिइन् ।

श्री सगरमाथामा काम गरेपछि रेडियो नेपालमा 'आजको अखबार' कार्यक्रम र त्यसपछि रेडियो सगरमाथामा काम गरेकी शर्माले सञ्चारिका समूहमा महासचिव भएर काम गरिन् । सञ्चारिका फिचर सेवा र समकोण टेलिभिजन कार्यक्रम मार्फत महिला तथा लैंगिक न्यायका विषयमा उनले निरन्तर आवाज उठाउँदै आइन् ।

२०८१ पुसमा भएको निर्वाचनमा महासंघको नेतृत्वमा पुगेकी शर्माका अनुसार पत्रकारहरूलाई पेशामा टिकाउनु हाल प्रमुख चुनौती रहेको छ । "पत्रकारका आधारभूत सुविधाका विषय छन्। पेशामा भविष्य नदेखेकाहरू अन्यत्र लागेका छन्। कोभिडपछि त झन् थुप्रै पत्रकारहरू पलायन भएका छन्। अब त पत्रकारहरूलाई पेशामा टिकाउनु नै मुख्य चुनौती देख्छु," शर्माले भनेकी छन् । अनलाइनखबरका पत्रकार कृष्ण ज्ञवालीले शर्माको प्रोफाइल गरेका छन् । 

२. सुविना श्रेष्ठ

अर्की प्रभावशाली पत्रकार सुविना श्रेष्ठले आफ्नो डकुमेन्ट्री फिल्महरू मार्फत नेपालका सामाजिक विषयहरूलाई अन्तर्राष्ट्रिय मञ्चमा पुर्‍याउन सफल भएकी छन् । सशस्त्र युद्धकालमा माओवादी नेतृ देवी खड्का लगायतका महिलाहरूले भोगेका अत्याचारको कथा 'देवी' डकुमेन्ट्री मार्फत उनले विश्वसामु ल्याएकी छन् । 

द्वन्द्वमा महिलामाथि भएको हिंसाबारे अन्तर्राष्ट्रिय मञ्चमा प्रस्तुत गर्न उनले निकै संघर्ष गर्नुपर्‍यो । आर्थिक संकट झेल्दै पाँच वर्षको मिहिनेतपछि तयार भएको 'देवी' डकुमेन्ट्रीले अहिले विभिन्न अन्तर्राष्ट्रिय अवार्डहरू जितिरहेको छ । 

"हामीले देवीको डकुमेन्ट्री मात्र बनाएनौं, उनलाई अन्तर्राष्ट्रिय मञ्चसम्म लैजाने काम गर्यौं," श्रेष्ठले भनेकी छन् ।

श्रेष्ठले डकुमेन्ट्री मार्फत माओवादी द्वन्द्वमा हिंसा भोग्ने महिलाहरूका कथा मात्र होइन, 'बर्थ इन नेपाल' र 'ह्वाट्स विहाइण्ड कास्ट भायोलेन्स इन नेपाल?' जस्ता डकुमेन्ट्रीहरू बनाएर नेपालका अन्य सामाजिक विषयहरू पनि विश्वसामु ल्याएकी छन् ।

युवा अवस्थामै छात्रवृत्तिमा अमेरिका पढ्न गएकी श्रेष्ठले बीबीसी, अलजजिरा, न्यूयोर्क टाइम्स र च्यानल फोर जस्ता अन्तर्राष्ट्रिय मिडियामा काम गर्दै आएकी छन् । अनलाइनखबरका पत्रकार गौरव पोखरेलले श्रेष्ठको प्रोफाइल गरेका छन् ।

अनलाइनखबरका अध्यक्ष धर्मराज भुसालले यो सूची शक्तिको प्रयोगका कारण चम्केका महिला नभइ आफ्नो मेधा, प्रतिभा अनि निरन्तरको संघर्ष र समर्पण साथै नयाँ उपलब्धिको खोजीका लागि अवरोधहरू चिर्दै डट्ने सामर्थ्य भएकाहरु मध्येबाट तयार गरिएको बताएका छन् । 

अनलाइनखबरको 'चालिस मुनिका चालिस' मा शेर्पाको कथा भन्ने दुई पत्रकार