प्रेस काउन्सिल नेपालले पत्रपत्रिका वर्गीकरणको नतिजा सार्वजनिक गरेको छ । पत्रपत्रिका वितरण सम्परीक्षण समितिको वर्गीकरण प्रतिवेदनको आधारमा आर्थिक वर्ष २०७७/०७८ को वर्गीकरणको नतिजा सार्वजनिक गरेको हो ।
आर्थिक वर्ष २०७७/०७८ को वर्गीकरणको लागि ८६८ वटा पत्रपत्रिकाहरूले आवेदन दिएका थिए । जसमध्ये ८५८ पत्रिका वर्गीकृत भएका छन् भने १० वटा पत्रपत्रिका कागजात तथा अंक नपुगेका कारण वर्गीकरणमा समावेश भएका छैनन् ।
काउन्सिलका अनुसार आवेदन स्वीकृत भएका ८५८ पत्रपत्रिका मध्ये ‘क’ वर्गमा ३०४, ‘ख’ वर्गमा ४०५, ‘ग’ वर्गमा १३० र ‘घ’ वर्गमा १९ वटा पत्रपत्रिका वर्गीकृत भएका छन् ।
वर्गीकरणका लागि आवेदन स्वीकृत भएका ८५८ पत्रपत्रिकामध्ये १२९ वटा राष्ट्रियस्तरका, १५८ वटा प्रदेशस्तरका, ५७१ वटा स्थानीयस्तरका रहेको काउन्सिलले जनाएको छ ।
काउन्सिलका अनुसार वर्गीकरणका लागि आवेदन दिने पत्रपत्रिका मध्ये १९० दैनिक, २ अर्धसाप्ताहिक, ५०९ साप्ताहिक, १२ पाक्षिक, ७६ मासिक, ५ द्वैमासिक, ८ त्रैमासिक, ५७ साहित्यिक र ९ भाषाभाषीका पत्रिकाहरू रहेका छन् ।
‘कारोबार' दैनिक वर्गीकरणमा परेन
वर्गीकरणको लागि आवेदन दिएका ८६८ पत्रपत्रिकामध्ये १० पत्रपत्रिकालाई अमान्य भएका छन् । कागजात नपुगेको र अंक नपुग भएका कारण यी पत्रपत्रिकाहरूलाई वर्गीकरणमा समावेश नगरिएको प्रेस काउन्सिलले जनाएको छ ।
आर्थिक पत्रिका कारोबार दैनिक पनि वर्गीकरणमा परेको छैन । कारोबारले करचुक्ता प्रमाणपत्र र सामाजिक सुरक्षाकर दाखिला भौचर पेश नगरेकाले वर्गीकरणका लागि दिइएको आवेदन अस्वीकृत भएको हो ।
त्यस्तै झपाबाट प्रकाशित हुने जनसंसद प्रादेशिक दैनिक, पुर्वेली साप्ताहिक, मोरङबाट प्रकाशित हुने हाम्रो मत प्रादेशिक दैनिक, राष्ट्रिय समाचार पत्र स्थानीय दैनिक, धनुषाबाट प्रकाशित हुने टुडे एकसप्रेस राष्ट्रिय दैनिक, काठमाडौंबाट प्रकाशित हुने लावण्य सन्देश स्थानीय साप्ताहिक, तलेजु स्थानीय मासिक, कृषि जर्नल स्थानीय मासिक र मकवानपुरबाट प्रकाशित साम स्थानीय साप्ताहिक पत्रपत्रिकाहरुलाई काउन्सिलले अमान्य ठानेको छ ।
