काठमाडौंबाट प्रसारण हुँदै आइरहेको बागमती टेलिभिजनका संवाददाताद्वय गौरव अधिकारी र सुमन निरौलालाई ज्यान मार्ने धम्की दिइएको छ । समाचार संकलनका क्रममा लमजुङ नगरपालिका ९ स्थित भोटेओडार सिर्जनात्मक बचत तथा ऋण सहकारी संस्थाका अध्यक्ष रामजी कँडेललगायतका व्यक्तिहरूले उनीहरूलाई ज्यान मार्ने धम्की दिएको नेपाल पत्रकार महासंघले जनाएको छ । महासंघले घटनामा संलग्नलाई कानुनबमोजिम कारबाही गर्न माग गरेको छ ।
उक्त सहकारीमा अनियमियता भएको जानकारी प्राप्त भएपछि साउन ३० गते मंगलबार पत्रकारद्वय अधिकारी र निरौला समाचार संकलनका लागि काठमाडौंबाट लमजुङस्थित सहकारी पुगेर अध्यक्ष कँडेललाई अनियमितताका बारेमा भनाइ राख्न आग्रह गरेका थिए ।
कँडेलले सहकारीका अन्य पदाधिकारी तथा व्यवस्थापकसहित पत्रकारद्वयलाई स्थानीय एक होटलमा लगेका थिए । लमजुङस्थित सुन्दरबजार नगरपालिका वडा नम्बर ८ र ९ का वडा अध्यक्षसमेतको संलग्नतामा पत्रकारद्वयलाई बन्धक बनाई ज्यान मार्ने धम्की दिइएको र परिचयपत्र तथा अन्य सामग्री पनि नियन्त्रणमा लिइएको टेलिभिजनले जनाएको छ ।
स्वतन्त्रतापूर्वक सञ्चार कर्ममा जुटेका पत्रकारमाथि सहकारीका जिम्मेवार पदाधिकारी तथा वडाका अध्यक्षसमेतको संलग्नतामा भएको हर्कत अत्यन्त निन्दनीय, गैरजिम्मेवार र प्रेस स्वतन्त्रतामाथिको ज्यादती भएको महासंघको ठहर छ ।
पत्रकारलाई हतोत्साहित र त्रसित बनाउने कार्यमा संलग्नमाथि कानुनबमोजिम कारबाही गर्न र पत्रकारको सुरक्षामा विशेष ध्यान दिई निर्वाध प्रेस स्वतन्त्रताको उपभोगको वातावरण निर्माण गर्न महासंघले माग गरेको छ ।
