नेपाल पत्रकार महासंघले सदस्य शुद्धीकरण समितिले निर्धारण गरेको मापदण्डअनुसार प्रदेश समितिबाट प्रस्तावित सदस्यका नाम सार्वजनिक गरेको छ ।
महासंघले सात प्रदेशसहित उपत्यका प्रदेश, प्रतिष्ठान प्रदेश र एसोसियट आबद्ध सदस्यहरूको अन्तिम नामावली शुक्रबार सार्वजनिक गरेको हो ।
महासंघको गत वर्ष सम्पन्न साधारण सभाले महासचिव रोसन पुरीको संयोजकत्वमा पूर्वमहासचिव उजिर मगर, निवर्तमान सचिव रामप्रसाद दाहाल र पूर्वसचिव धर्मेन्द्र कर्ण रहेको ४ सदस्यीय सदस्य शुद्धीकरण समिति बनाएको थियो ।
‘व्यावसायिक र जिम्मेवार पत्रकारिताको विकासका लागि स्वच्छ र व्यावसायिक पत्रकारितालाई प्रवर्द्धन गर्ने उद्देश्यले नेपाल पत्रकार महासंघको विधान, २०६० (पाँचौ संशोधन, २०७५) को धारा ९, धारा १८ तथा ४३ बमोजिम २०७९ पुस ८ र ९ गते साधारण सभाबाट शुद्धीकरण समिति बनाएको’ थियो ।
गत वर्ष चैत १६ गते नवलपरासी रामग्राममा सम्पन्न केन्द्रीय समिति बैठकबाट महासंघको सदस्य शुद्धीकरण मापदण्ड, २०७९ अनुमोदन गरिएको थियो ।
नाम सार्वजनिक भएका सदस्यहरूका बारेमा कुनै उजुरी भएमा आउँदो कात्तिक ११ गतेसम्म प्रस्तावित नामउपर दाबी विरोध, सफाइको मौका र न्यायका लागि आह्वान गर्ने समय निर्धारण गरिएको महासंघले जनाएको छ ।
"छानबिन समितिले बनाएको मापदण्ड अनुसार जिल्ला प्रदेशबाट केन्द्रमा आएको प्रस्तावित नाम सार्वजनिक गरिएको छ", सदस्य शुद्धीकरण समितिका एकजना सदस्य एवं महासंघका पूर्व महासचिव उजिर मगरले भने, "कतिपय जिल्ला, प्रदेशमा विवाद रहेकाले सफाइ र न्यायका लागि आवेदन आव्हान गरिएको छ । अब छानबिन सुरु भयो ।"
प्रस्तावित नामउपर दाबी विरोध, सफाइको मौका र न्यायका लागि नेपाल पत्रकार महासंघको [email protected] इमेलमा उजुरी गर्नुपर्ने महासंघले जनाएको छ । अन्य इमेलमा पठाएको उजुरीमाथि कारबाही नहुने महासंघले जनाएको छ । उजुरी प्राप्त नभएमा प्रकाशित नामावलीलाई नै कायम गरिने महासंघले जनाएको छ ।
हेर्नुस् प्रदेश समितिहरूबाट प्राप्त अन्तिम नामावलीः
यसअघि शीर्षकमा 'अन्तिम' भनिएकोमा गलत अर्थ लागेकाले सच्याइएको ।
