सेतोपाटी डट कमले प्रिमियम सामग्री पढ्न शुल्क तिर्नुपर्ने व्यवस्था गरेको छ । 'प्रिमियम' सामग्रीहरू सेतोपाटीका सदस्यहरूले मात्र पढ्न पाउने सेतोपाटीले प्रकाशकीयमार्फत् जनाएको छ ।
"कुनै पनि सञ्चारगृहको वार्षिक खर्चको महत्त्वपूर्ण अंश पाठकहरूले नबेहोरून्जेल त्यो सञ्चारगृहले स्वतन्त्र र निष्पक्ष पत्रकारिता गर्न सक्दैन", सेतोपाटीले प्रकाशकीयमा भनेको छ, "आम्दानीको ८०–९० प्रतिशत विज्ञापनले धान्ने सञ्चारगृह अन्ततः पाठकमा होइन, बजारमाथि निर्भर हुन पुग्छ । अर्थशास्त्रको सामान्य तर क्रुर नियम यही हो ।"
लोकरिझ्याइँको हुरी चलेको यो समयमा नडराइकन र नबहकिकन आफ्नो कुरा भन्न सक्ने पत्रकारिताको महत्त्व समाजमा बढेको सेतोपाटीको तर्क छ ।
२०७३ सालमै सेतोपाटीले शुल्क तिरेर सामग्री पढ्ने व्यवस्था मिलाउने घोषणा गरेको थियो । "तर देशभित्र र बाहिरबाट शुल्क तिर्न 'पेमेन्ट गेट-वे' हरूको राम्रो विकास नभइसकेका कारण हामी त्यो बेला आफ्नो योजनामा अघि बढ्न सकेनौं", सेतोपाटीले भनेको छ, "पछिल्लो समय डिजिटल पेमेन्टको क्षेत्रमा उल्लेख्य प्रगति भएको छ । केही समयदेखिको तयारीपछि हामीले ती सबै प्राविधिक काम सकेका छौं ।"
तिहारपछि सेतोपाटीमा प्रकाशित हुने प्रिमियम समाचार, लेख र शृंखलाहरू सदस्यता लिएका पाठकहरूले मात्र पढ्न पाउने भएका छन् । अरू समाचार भने सबै पाठकहरूले पढ्न पाउने छन् ।
तत्कालका लागि नेपालबाट वार्षिक सदस्य बन्नेले मासिक एक सय रूपैयाँ र विदेशबाट वार्षिक सदस्य बन्नेहरूले मासिक दुई डलर तिर्नुपर्ने छ । यो छुटसहितको शुल्क हो ।
नेपालबाट सदस्य बन्ने पाठकहरूले कुनै पनि बैंकको एटिएम कार्ड वा विभिन्न बैंक वा वित्तीय कम्पनीका क्युआर कोड प्रयोग गरेर शुल्क तिर्न सक्नेछन् । विदेशमा बस्ने पाठकहरूले आफ्नो भिसा वा मास्टर-कार्ड प्रयोग गरेर शुल्क तिर्न सक्नेछन् ।
"आर्थिक आत्मनिर्भरतासँगै हामी सेतोपाटीलाई थप सबल र थप सिर्जनशील बनाउने छौं", सेतोपाटीले भनेको छ, "हामी पत्रकार र पाठक मिलेर नै नेपाली समाजमा बलियोसँग उभिने एउटा सशक्त सञ्चारगृह बनाउन सक्नेछौं । त्यसमा तपाईंहरूको साथ रहनेछ भन्ने हाम्रो दृढ विश्वास छ ।"
