काठमाडौँ विश्वविद्यालय, कला सङ्काय (स्कुल अफ आर्टस्) अन्तर्गत भाषा तथा आमसञ्चार विभागले आउँदो चैत्र २२ र २३ गते नेपालमा चलचित्र निर्माणसम्बन्धी राष्ट्रिय सङ्गोष्ठी आयोजना गर्ने भएको छ ।
चलचित्रकर्मी, शिक्षाकर्मी, अनुसन्धानकर्ता, समीक्षक र विद्यार्थीहरूबीच समन्वय विकासका लागि सङ्गोष्ठी आयोजना गरिएको कला सङ्कायले जनाएको छ ।
विभागले कार्यक्रमका लागि छानिएका शीर्षकहरूमा केन्द्रित रही अनुसन्धानमूलक रचना पेश गर्न अनुरोध गरेको छ ।
नेपाली चलचित्रको अन्तर्वस्तु विश्लेषण (कन्टेन्ट एनालाइसिस) डिजिटल क्रान्ति, कृत्रिम बौद्धिकता र चलचित्र चलचित्रको विविधता र समावेशीकरण, चलचित्र निर्माण प्रविधि, लैङ्गिकता र चलचित्र, ऐतिहासिक आख्यान, नेपाली चलचित्रमा देशभक्ति, जलवायु परिवर्तन र चलचित्रमा दिगोपन, चलचित्र, संस्कृति र समाज, चलचित्रमा ध्वनिको प्रयोग, युवा र चलचित्र निर्माणको भविष्य आदि विषयमा सङ्गोष्ठीमा प्रस्तुतिकरण तथा छलफलहरू आयोजना हुनेछन् ।
कार्यक्रमका लागि माघ १८ गतेभित्र लेखसार पेश गर्न सकिन्छ भने फागुन १७ गतेभित्र पूर्णलेख पेश गर्नुपर्ने छ ।
छनोट समितिले समयसीमाभित्र प्राप्त लेखहरूको समीक्षा गर्नेछ । पेश गरिएका कागजात तथा अनुसन्धानको पूर्ण स्वरूप, मौलिकता, प्राविधिक पक्ष, अनुसन्धान दायरा, भाषिक शुद्धता र सान्दर्भिकतामा आधारित भई विस्तृत समीक्षा गरिने सम्मेलन आयोजकले जनाएको छ ।
छनोट समितिबाट चयन गरिएका लेखकहरूलाई सम्मेलनमा प्रस्तुतिका लागि सूचित गरिने छ । छानिएका लेखहरू काठमाडौँ विश्वविद्यालयको भाषा तथा आमसञ्चार विभागले २०६४ देखि प्रकाशित गर्दै आएको अन्तरविषयक जर्नल बोधिमा प्रकाशित हुनेछन् ।
