न्यूनतम पारिश्रमिक निर्धारण समितिको अध्यक्षमा सङ्गीता खड्का दोहोरिएकी छिन । सिंहदरबारमा जेठ ३ गते बसेको मन्त्रिपरिषद् बैठकले खड्कालाई न्यूनतम पारिश्रमिक निर्धारण समितिको अध्यक्षमा नियुक्त गरेको हो ।
मन्त्रिपरिषद् बैठकको निर्णय सार्वजनिक गर्दै सञ्चार तथा सूचना प्रविधिमन्त्री रेखा शर्माले सङ्गीता खड्कालाई अध्यक्ष नियुक्त गरेको जानकारी दिइन् ।
मन्त्रालयले वैशाख २७ गते सूचना जारी गरेर मेगराज खड्का, सङ्गीता खड्का, डा. मधुसुधन न्यौपाने, सोम प्रसाद डोटेल र फणिन्द्र फुयालको आवेदन स्वीकृत भएको जानकारी दिएको थियो ।
सञ्चार तथा सूचना प्रविधि मन्त्रालयले वैशाख १६ गते गोरखापत्र दैनिकमा सूचना निकालेर अध्यक्ष पदको लागि आवेदन माग गरेको थियो ।
न्यूनतम पारिश्रमिक निर्धारण समितिले सञ्चारमाध्यममा कार्यरत पत्रकार, कर्मचारी र कामदारको पारिश्रमिक निर्धारण गर्ने, समयअनुसार पुनरावलोकन गरेर नेपाल सरकारलाई सिफारिस गर्ने र पत्रकारले पाउनुपर्ने अन्य सेवासुविधा पाएका छन् कि छैनन् अनुगमन गरी प्रतिवेदन पेश गर्ने काम गर्दछ ।
श्रमजीवी पत्रकारसम्बन्धी ऐन २०५१ (पहिलो संशोधन– २०६४) को दफा ११ बमोजिम न्यूनतम पारिश्रमिक निर्धारण समिति गठन भएको थियो । नेपाल सरकारको मन्त्रिस्तरीय निर्णयबाट २०६४ भदौ २८ गते समिति गठन भएको हो ।
