मदन पुरस्कार गुठीले ‘मदन पुरस्कार-२०८०' का लागि पाँच पुस्तक छनोट गरेको छ । मदन पुरस्कार गुठीले यसपटकको पुरस्कारका लागि प्राप्त ३ सय ४ पुस्तकमध्ये ५ पुस्तक छानिएको मंगलबार विज्ञप्तिमार्फत् जनाएको हो ।
पुरस्कारका लागि भक्त स्याङ्तानको 'डम्फुको आत्मालाप', जीवन क्षेत्रीको 'नुन तेल', भावेश भूमरी र प्रणिता चामलिङको 'भावलिपि', मोहन मैनालीको 'मुकाम रणमैदान' र रोशन थापा ‘नीरव’को 'सन्त्रासका साठी दिन' छनोट गरिएको हो ।
छानिएका ५ पुस्तकमध्ये एउटाले वर्ष-२०८० को मदन पुरस्कार जित्नेछ ।
मदनशमशेर राणाको स्मृतिमा प्रत्यक वर्ष यो पुरस्कार प्रदान गरिन्छ । रानी जगदम्बाबाट स्थापित मदन पुरस्कारको स्थापना २०१२ साल भएको थियो ।
मदन पुरस्कारको पहिलो घोषणा २०१३ सालमा र सम्मान कार्यक्रम २०१४ सालमा भएको थियो ।
२०१३ सालमा पहिलोपटक 'हाम्रो लोक संस्कृति' का लागि सत्यमोहन जोशी, 'जनरल भीमसेन थापा' का लागि चित्तरञ्जन नेपाली तथा 'अधिकविभव स्थिरविद्युत् उत्पादक' का लागि बलराम जोशीले मदन पुरस्कार प्राप्त गरेका थिए ।
गुठीको निर्णयअनुसार प्रारम्भमा सम्मान पुरस्कारको रकम चार हजार थियो । तर २०७५ सालदेखि पुरस्कार रकम बढेर चार लाख रुपैयाँ भएको हो ।
