.jpg)
काठमाडौंको बबरमहलस्थित नेपाल कला परिषदमा फोटोग्राफर किशोर कायस्थको "मुस्ताङ नोस्टाल्जिया: दुई दशकको यात्रा" प्रदर्शनी जारी छ ।
फोटोग्राफर किशोर कायस्थले मुस्ताङमा विगत दुई दशकमा खिचेका ३० वटा पानोरामिक तस्बिरहरू यस प्रदर्शनीमा समावेश गरिएको छ ।
फोटोका माध्यमबाट फोटोग्राफर किशोर कायस्थले मुस्ताङको मनमोहक भू-दृश्य, समृद्ध इतिहास र सांस्कृतिक रहस्यमयलाई जीवन्त राखेका छन् । उनले दुई दशकलाई आफ्नो आध्यात्मिक यात्रा भन्छन् ।
२० वर्ष पहिला उनी मुस्ताङ पुगेका थिए । तर भौगोलिक प्रतिकूलताले उनलाई सजिलै मुस्ताङको मजा लिन दिएन । “मैले त्यहाँ शारीरीक रूपमा अशक्त धेरै विदेशीहरू देखे, एकजना दृष्टिविहीन विदेशी पर्यटक हुनुहुन्थ्यो । तपाईँ कसरी यहाँ सम्म आउनुभयो भनेर प्रश्न गर्दा उहाँले म पृथ्वीलाई स्मेल गर्न (सुँघ्न) सक्छु, मेरो आँखा नभएर के भयो त ? भन्नुभयो”, कायस्थ सम्झन्छन्, “मलाई त्यो कुराले धेरै छोयो । त्यसपछि मैले यो प्रोजेक्टको योजना बनाएको हुँ ।”
उनका अनुसार फोटोग्राफी एउटा पेशा वा कला भन्दा बढी जीवन जिउने एउटा तरिका हो । यो फोटो प्रदर्शनी गर्न पाउनु आफ्नो लाइफको ह्याप्पी मोमेन्ट (जीवनकै सर्वाधिक हर्षको क्षण) भएको उनी बताउँछन् ।
गहेन्द्र धिमाल फाउन्डेसनले अमेरिकी दूतावासको सहकार्यमा गरेको प्रदर्शनी माघ १ गते सम्म सञ्चालन हुनेछ ।
