नेपाल बार एसोसिएसनका पूर्व अध्यक्ष तथा वरिष्ठ अधिवक्ता शम्भु थापाले समाचार संकलन गरिरहेका फोटो पत्रकारमाथि हातपात गरेका छन् ।
बिहीबार नेकपा एकीकृत समाजवादीको केन्द्रीय कार्यालयमा समाचार संकलनका लागि पुगेका नेपाल प्रेसका फोटो पत्रकार उमेश कार्कीमाथि थापाले दुर्व्यवहार गरेका हुन् ।
उक्त घटनाको भिडियो सार्वजनिक भएपछि नेपाल पत्रकार महासंघले शुक्रबार एक विज्ञप्ति जारी गर्दै घटनाको भर्त्सना गरेको छ । अधिवक्ता थापालाई सार्वजनिक रूपमा क्षमायाचना गर्न महासंघले माग गरेको छ ।
के थियो घटना?
बिहीबार, जेठ २२ गते, नेकपा एकीकृत समाजवादीको सचिवालय बैठकको समाचार संकलन गर्न पत्रकारहरू पार्टी कार्यालय आलोकनगर पुगेका थिए ।
सोही क्रममा पार्टी कार्यालयबाट निस्कँदै गरेका वरिष्ठ अधिवक्ता थापाको फोटो खिच्न लाग्दा उनले पत्रकार कार्कीको क्यामेरा हातले धकेलेर अवरोध गरेका हुन् ।
सार्वजनिक भएको भिडियोमा थापाले आक्रोशित हुँदै पत्रकारको क्यामेरा पन्छाएको स्पष्ट देखिन्छ ।
पत्रकार महासंघको आपत्ति
नेपाल पत्रकार महासंघका महासचिव रामप्रसाद दाहालले जारी गरेको विज्ञप्तिमा स्वतन्त्र रूपमा आफ्नो पेशागत धर्म निर्वाह गरिरहेका पत्रकारमाथि भएको यस्तो व्यवहार खेदजनक भएको उल्लेख छ ।
"न्याय क्षेत्रका जिम्मेवार व्यक्तिबाट भएको यो व्यवहार व्यावसायिक मर्यादाविपरीत हुनुका साथै अशोभनीय र आपत्तिजनक छ", विज्ञप्तिमा भनिएको छ, "सार्वजनिक स्थलमा कुनै पनि सार्वजनिक व्यक्तिका बारेमा भिडियो र फोटो खिच्नु तथा प्रश्न सोध्नु पत्रकारको पेसागत धर्म हो। यसमाथि हमला हुनु खेदजनक कार्य हो ।"
महासंघले प्रेसको संविधानप्रदत्त अधिकारको सम्मान गर्न र आगामी दिनमा यस्ता घटना नदोहोर्याउन सम्बन्धित पक्षको ध्यानाकर्षण गराएको छ।
साथै, महासंघले वरिष्ठ अधिवक्ता थापालाई उक्त घटनामा क्षमायाचना गर्न आग्रह गरेको छ। यो घटनालाई महासंघले प्रेस स्वतन्त्रतामाथिको हस्तक्षेपको रूपमा लिएको छ । पत्रकार सम्बद्ध अन्य संघसंस्थाले पनि घटनाको भत्सर्ना गरेका छन् ।
