सरकारले गत आइतबार नागरिक सम्बन्धी अध्यादेश ल्याएपछि त्यसका पक्ष विपक्षमा तर्क वितर्कहरू जारी छन् । तर यहाँ तर्क वितर्क मात्र होइन, भ्रमको खेती पनि सुरु भएको छ । र, यो खेतीको गन्ध अलिक (अ)राजनीतिक देखिएको छ ।
जस्तो, नेकपा एमालेको माधव नेपाल समूहका नेता भीम रावलको ट्विटलाई लिउँ । रावलले वीरगञ्जमा नागरिकता लिनेको भिड लागेको र त्यसमा भारतबाट आउनेको ठूलो संख्या रहेको दाबी गरेका छन् । उनले यो ट्विट मंगलबार बिहान डिलिट गरेका छन् । (अर्काइभमा हेर्नुस्)
‘वीरगञ्जमा नागरिकता लिनेको भिड लागेको र त्यसमा भारतबाट आउनेको ठूलो संख्या रहेको समाचार आयो’, रावलले ट्विटरमा लेखेका छन्, ‘प्रम केपी ओलीको निषेधाज्ञा जनतालाई घरमा बन्द गरेर नेपाली नागरिकता विदेशीलाई समेत चकलेट बाँडे जस्तै गर्नलाई हो कि ? नेपाली जनतालाई जवाफ चाहियो। सम्पूर्ण देशभक्त नेपाली राष्ट्र जोगाउन सक्रिय बनौं !’
रावलको ट्विट मंगलबार बिहानसम्ममा २६६ रिट्विट भएको छ । कति मिडियाले यसलाई जस्ताका तस्तै समाचारको विषय पनि बनाएका छन् ।
के रावलले दाबी गरेजस्तो वीरगञ्जमा नागरिकता लिनेको भिड लागेको हो ?
पर्साका प्रमुख जिल्ला अधिकारी पिताम्बर घिमिरेले जेठ १३ गते राति १२ बजेसम्म निषेधाज्ञा जारी रहेको बताए । “शान्तिसुरक्षा र कोभिड-१९ नियन्त्रण सम्बन्धी बाहेक कुनै पनि सेवा हामीले सञ्चालन गरेका छैनौँ”, प्रजिअ घिमिरेले भने, "नागरिकता दिने त कुरै भएन ।"
जिल्ला प्रशासन कार्यालय पर्साले सुरुमा वैशाख ७ गते, त्यसपछि वैशाख १४ गते र त्यसपछि जेठ ६ गते जारी सूचनाहरू हेर्नुहोस् । यी सूचनामा निषेधाज्ञाका बेला अत्यावश्यक बाहेकका सेवामा रोक लगाइएको जनाइएको छ ।
उसोभए हुँदै नभएको विषयमा रावलले किन भ्रम फैलाए त ? हामीले उनलाई सोध्ने प्रयास गर्यौँ । पहिला उनको फोन उठेन । पछि जुम मिटिङमा छु भनेर फोन काटे ।
अहिले भने उनले अर्को ट्विट गरेर पुरानो समाचारका आधारमा आफूले त्यस्तो लेखेको र उक्त ट्विट हटाएको भनेका छन् ।
मैले विरगंजमा नागरिकता लिनेको भीड देखियो भन्ने समाचार आयो सरकारले जनतालाई जवाफ देओस् भनेर सोध्नु कुनै गलत कुरा होइन ।सरकारले प्रष्ट पारे भइहाल्यो। तर उक्त समाचार पुरानो भनी ध्यान आकर्षित गराउनु हुने सबैलाई धन्यवाद दिदै मेरो त्यो ट्वीट हटाउने जानकारी गराउँछु।
— Dr. Bhim Rawal (@BhimRawal179) May 25, 2021
रावलले ट्विट हटाएका छन् तर पुरानो समाचारका आधारमा अहिले संकटका बेला हुँदै नभएको कुरा गरेर जनमानसमा भ्रम पारेँ भनेर स्वीकार्नु त परको कुरा आफ्नो कुरालाई गलत नभएको दाबी समेत गरेका छन् ।
नेकपा एमालेका उपाध्यक्ष, उपप्रधान तथा रक्षा, गृह आदि मन्त्रालय सम्हालिसकेको नेता भीम रावलले हुँदै नभएको विषयमा किन भ्रम फैलाएका होलान् ?
तपाईँलाई के लाग्छ ? कमेन्ट बक्समा लेख्नुस् ।
