कान्तिपुर मिडिया ग्रुपले फोटो पत्रकारहरूलाई गैरकानुनी ढंगले निष्कासन गरेको भन्दै फोटो पत्रकार क्लब नेपालले विरोध गरेको छ । क्लबका कार्यवाहक अध्यक्ष दिपेश श्रेष्ठले सोमबार जारी गरेको विज्ञप्तिमा समस्याहरुको उचित र सम्मानजनक समाधान खोज्न माग गरिएको छ।
कान्तिपुर मिडिया ग्रुप अन्तर्गत कान्तिपुर पब्लिकेसनले त्यहाँ कार्यरत फोटो पत्रकारहरूलाई निष्कासन गरिएको तथा विभिन्न छापा तथा अनलाइन संचार माध्यमहरूमा समयमै पारिश्रमिक नदिइएको क्लबले जनाएको छ । प्रचलित कानुन, विधि र पद्धति विपरीत संचारगृहहरूमा भएका पत्रकार निष्कासन लगायतका कामको क्लबले आलोचना गरेको छ ।
"श्रमजीवी पत्रकार ऐन, प्रचलित विधि र पद्धतिविपरीत पत्रकारलाई पेशाबाट निष्कासन गर्ने, कानुनविपरीत सरुवा गर्ने, समय मै पारिश्रमिक नदिने र संचारकर्मीहरुको लामो समयको योगदानको अवमूल्यन गर्दै अपमानित गर्ने कार्यहरुको पनि क्लब घोर भत्सर्ना गर्दछ", विज्ञप्तिमा भनिएको छ ।
नेपाल पत्रकार महासंघ कान्तिपुर प्रतिष्ठान शाखाले त्यहाँको व्यस्थापन समक्ष राखेको मागहरूप्रति फोटो पत्रकार क्लबले पूर्ण समर्थन तथा ऐक्यवद्धता जनाएको छ । गत असोज ९ गते कान्तिपुरले ६८ जना कर्मचारीहरूलाई कानुन विपरीत अवकाश पत्र दिएको थियो ।
कान्तिपुरले पछिल्लो समय त्यहाँ कार्यरत श्रमजीवी पत्रकारहरूलाई विभिन्न बाहनामा हतोत्साही गर्न थालेको छ । कान्तिपुरस्थित नेपाल पत्रकार महासंघको शाखाले व्यवस्थापनसमक्ष १२ बुँदे माग पेश गरेको छ । आइतबार पत्रकारहरूलाई वार्तामा बोलाइए पनि व्यवस्थापनले पछि वार्तामा बस्न अलटाल गरेको त्यहाँका पत्रकारहरूले बताएका छन् ।
नेपाल पत्रकार महासंघले आइतबार कान्तिपुरलाई समस्या समाधानका लागि दबाब दिँदै आन्दोलनको चेतावनी दिएपछि व्यवस्थापन वार्ताबाट भागेको कान्तिपुरका पत्रकारहरूको दाबी छ ।
