नेपाल मानव अधिकार अन्तर्राष्ट्रिय चलचित्र महोत्सवमा २६ देशका मानव अधिकार सम्बन्धी ५४ फिल्म देखाइँदैछ ।

मानव अधिकार फिल्म सेन्टरको आयोजनामा मंसिर २३ गते देखि २६ गतेसम्म नेपाल मानव अधिकार अन्तर्राष्ट्रिय चलचित्र महोत्सवको ११ औं संस्करण हुन लागेको हो । प्रत्येक वर्ष मानव अधिकारसँग सम्बन्धित फिल्मका लागि आवेदन आह्वान गरिन्छ । यो संस्करणको नारा 'सामूहिक अधिकार' रहेको छ ।

नेपाल मानव अधिकार अन्तर्राष्ट्रिय चलचित्र महोत्सवमा प्रदर्शन गरिने ५४ फिल्म भृकुटीमण्डपस्थित नेपाल पर्यटन बोर्डमा मंसिर २३ देखि २६ गते सम्म र चाबहिलस्थित चलचित्र विकास बोर्डमा मंसिर २४ र २५ गते देखाइनेछ ।

फिल्म हेर्न शुल्क नलाग्ने र हरेक उमेर समूहले फिल्म हेर्न सक्ने नेपाल मानव अधिकार अन्तर्राष्ट्रिय चलचित्र महोत्सवमा निर्देशक पान्डव खत्रीले जानकारी दिए ।

“फिल्म हेर्न कुनै शुल्क लाग्दैन । सबै उमेर समूहले हेर्न सक्नुहुन्छ", निर्देशक खत्रीले भने, "फिल्ममा कुनै एडल्ट कन्टेन्ट छ भने हामी पहिला नै दर्शकलाई भन्छौं, हाम्रा स्वयंसेवक साथीहरूले त्यसबारे पहिला नै जानकारी दिनुहुन्छ ।"  

नेपाल मानव अधिकार अन्तर्राष्ट्रिय चलचित्र महोत्सवमा लागि ६ महिना पहिला आवेदन खोलिएको थियो । विश्वभरबाट ७ सय भन्दा बढी आवेदन आएको फिल्म उत्सवका निर्देशक खत्रीले बताए ।

विश्वभरबाट आएका आवेदनमध्ये छनोट समितिले नेपालका १८ फिल्म र अन्य मुलुकका ३६ फिल्म छानेको छ । 

पुरस्कृत गरिने फिल्मका विधाहरू

नेपाल मानव अधिकार अन्तर्राष्ट्रिय फिल्म महोत्सवमा प्रदर्शन गरिने फिल्मको मूल्याङ्कन तीन सदस्यीय निर्णायक मण्डलले गर्ने छ ।

निर्णायक मण्डलमा नेपालकी कलाकार तथा थिएटर आर्टिस्ट पशुपति राई, भारतकी फिल्म निर्माता तथा फिल्म प्रशिक्षक अनुपमा बोस र लन्डनका Participatory and Ethnographic Documentary Filmmaker माइकल ब्राउन रहेका छन् ।

निर्णायक मण्डलको निर्णयका आधारमा ५ उत्कृष्ट फिल्मलाई पुरस्कृत गरिनेछ ।

अन्तर्राष्ट्रिय फिचर प्रतिस्पर्धा, अन्तर्राष्ट्रिय सर्ट फिक्सन तथा ननफिक्सन र नेपाली सर्ट फिक्सन तथा ननफिक्सन विधामा नगद सहित पुरस्कार प्रदान गरिने छ। त्यस्तै महोत्सवमा एकजना उत्कृष्ट नेपाली महिला निर्देशकलाई पनि पुरस्कृत गरिनेछ।

यस वर्ष महोत्सवमा 'सिनेमा विकासको लागि राजनीतिक प्रतिवद्धता’ र ‘सामूहिका अधिकारः अन्तर्राष्टिय प्रतिवद्धता, अभ्यास र राज्यको दायित्व' विषयमा राजनीतिकर्मी, अधिकारकर्मी र फिल्मकर्मीहरूबीच दुईओटा प्यानल छलफल पनि राखिएको छ।

महोत्सवमा मानव अधिकारसँग सम्बन्धित फोटो प्रदर्शनी पनि हुने आयोजकले जनाएको छ।