आगामी माघ ८ गते भारतको उत्तर प्रदेशस्थित अयोध्यामा हुन गइरहेको राम मन्दिरको प्राण प्रतिष्ठा समारोहको पूर्वसन्ध्यामा त्यससम्बन्धी समाचार प्रकाशित भएका छन् । यसै सन्दर्भमा गेरू वस्त्र लगाएका मानिस एउटा धार्मिक र्यालीमा सहाभागी भएको भिडियो पहिले ट्विटर भनिने एक्स लगायत सामाजिक सञ्जालमा फैलिएको छ । सडकको दायाँबायाँ रूखहरु देखिन्छन् भने निकै परसम्म मानिसको लामो लस्कर देखिन्छ ।
एक्स अकाउन्ट @abhi_dave मा पुष २८ गते उक्त भिडियोसहित यस्तो पोष्ट गरिएको छ : “नेपालमा मा सीताको घरबाट अयोध्यास्थित रामको मन्दिरमा विवाह उपहार जुलुस ।” माघ २ गतेसम्म उनको पोष्टमा २ लाख ६० हजारभन्दा बढी भ्युज, ९ हजार भन्दा बढी लाइक र १ हजार सात सयभन्दा बढी रिपोष्ट भएको छ । सोही भिडियो उक्त दाबीका साथ फेसबुकमा पनि सेयर गरिएको छ । हेर्नुहोस् अर्काइभ ।
यो भिडियोमा देखिएको दृश्य नेपालस्थित सीताको घरबाट भारतको अयोध्यास्थित रामको मन्दिरतर्फ गइरहेको विवाह जुलुस हो कि हैन भनेर हामीले सत्यापन गरेका छाैँ।
हामीले उक्त भिडियोको स्क्रिनसट गुगल लेन्समा अपलोड गर्याै । त्यसमा पनि उक्त भिडियो धेरैले सेयर गरेको पाइयो ।
तथ्य जाँचका लागि हामीले पुन: स्क्रिनसट गुगलमा अपलोड गरी खोजी गर्यौँ। त्यस क्रममा हामी “देवो कि नगरी देवभूमि” नामक फेसबुक पेजमा पुग्याैँ । त्यसमा गत असार २७ गते पोष्ट गरिएको भिडियोमा “ग्रेटर नोइडा बागेश्वरधाम सरकार” उल्लेख छ । भिडियोमा गेरू वस्त्र लगाएका भक्तालुहरु “जय राम जानकि बैठे हे मेरे सिने मे” भन्दै कलश बोकेर जुलुसमा सहभागी भएको देखिन्छ ।
यसका आधारमा हामीले थप खोजी गर्दा इटिभी भारतको वेबसाइट पुग्याैँ । त्यसमा प्रकाशित समाचार अनुसार भारतको राजधानी नयाँ दिल्ली नजिक ग्रेटर नोइडामा पण्डित धीरेन्द्र कृष्ण शास्त्रीले भागवत कथा वाचन गर्नुअघि कलश यात्रा भएको थियो । समाचारमा बताइए अनुसार गत असार २५ गतेदेखि एक साता लामो भागवत कथा वाचन सम्पन्न भएको थियो । उक्त भिडियो सोही समारोहको भएको फेला पर्यो ।
नेपालस्थित सीताको घरबाट भारतको अयोध्यास्थित रामको मन्दिरतर्फ गइरहेको विवाह जुलुस भनी फैलाइएकाे भिडियाे ६ महिना अघि भारतको ग्रेटर नोइडामा भएको धार्मिक समारोहको हो।
| दाबी | दाबीकर्ता | नेपाल चेक निष्कर्ष |
| नेपालस्थित सीताको घरबाट भारतको अयोध्यास्थित रामको मन्दिरतर्फ गइरहेको विवाह जुलुसको भिडियाे । | सामाजिक सञ्जाल प्रयाेगकर्ता | भ्रामक |
नेपालस्थित सीताको घरबाट भारतको अयोध्यास्थित रामको मन्दिरतर्फ गइरहेको विवाह जुलुस भन्दै सामाजिक सञ्जालमा फैलिएकाे दाबीकाे तथ्य जाँच गरेपछि नेपाल चेककाे निष्कर्ष।
First Published by Nepalcheck.org
