प्रधान सम्पादक गुणराज लुइँटेलले राजीनामा दिएपछि नेपाल रिपब्लिक मिडिया लिमिटेडले ‘नागरिक दैनिक’ को सम्पादकमा पत्रकार बालकृष्ण अधिकारीलाई नियुक्त गरेको छ ।
नेपाल रिपब्लिक मिडियाको सञ्चालक समितिको २०८३ जेठ ७ गते बसेको बैठकले अधिकारीलाई सम्पादक नियुक्त गरेको उक्त संस्थाका अध्यक्ष रोमनाथ घिमिरेले जानकारी दिए ।
“सञ्चालक समितिले यहीँ कार्यरत पत्रकार बालकृष्ण अधिकारीलाई सम्पादक नियुक्त गरेको छ”, अध्यक्ष घिमिरेले भने, “समाचारकक्षहरूमा नेतृत्त्व परिवर्तनलाई हामीले स्वभाविक लिएका छौँ, यो नियमित प्रक्रिया हो ।” 
नागरिक दैनिकका प्रधान सम्पादक गुणराज लुइँटेलको राजीनामा
त्यसअघि आज नै नागरिक दैनिकका प्रधान सम्पादक गुणराज लुइँटेलको राजीनामा सञ्चालक समितिले स्वीकृत गरेको थियो ।
२०७२ जेठ १२ गते नागरिक दैनिकको सम्पादकीय नेतृत्त्व सम्हालेका लुइँटेलले त्यहाँ ११ वर्ष बिताए ।
“दशक बढी एउटै प्रतिष्ठित समाचारकक्षमा अनवरत काम गर्नु मेरा लागि अवसर थियो”, लुइँटेलले भने, “दैनन्दिन गरिने उस्तैखाले कामबाट विश्राम लिएको मात्र हो, फेरि पनि गर्ने त पत्रकारिता नै हो ।”
लुइँटेलले रिपोर्टिङ, लेखनमार्फत् आफू सक्रिय भइरहने बताए ।
केही समयदेखि नेपाल रिपब्लिक मिडिया लिमिटेडका संस्थापक विनोराज ज्ञवाली, उनकी पत्नी तथा सञ्चालक शोभा ज्ञवाली र कम्पनीमा प्रबन्ध निर्देशक रहेकी छोरी समृद्धि ज्ञवालीले सञ्चालक समितिबाट शृङ्खलाबद्ध रुपमा राजीनामा दिएका थिए ।
राजीनामा दिएका उनीहरू प्रधान सम्पादक लुइँटेलको बिदाइ र नवनियुक्त सम्पादक अधिकारीको स्वागतमा भने उपस्थित थिए ।
वायाँबाट क्रमशः नागरिकका नवनियुक्त सम्पादक अधिकारी, निवर्तमान प्रधान सम्पादक लुइँटेल, नेपाल रिपब्लिक मिडियाका संस्थापक विनोदराज ज्ञवाली र निवर्तमान प्रबन्ध निर्देशक समृद्धि । फोटोः पत्रकार सुभद्रा धितालको फेसबुकबाट साभार ।
नेपाल रिपब्लिक मिडिया लिमिटेडका संस्थापक ज्ञवाली परिवारका सदस्यहरूले सञ्चालक समितिबाट शृङ्खलाबद्ध राजीनामा दिएपछि घिमिरे हालैमात्र अध्यक्ष निर्वाचित भएका हुन् ।
नवनियुक्त सम्पादक बालकृष्ण अधिकारी नागरिक दैनिकमै लामो समयदेखिका पत्रकार हुन् । सम्पादक नियुक्त हुनुपूर्व नागरिकको राजनीतिक ब्यूरो प्रमुखको जिम्मेवारीमा रहेका उनी दुई दशक भन्दा बढी समयदेखि पत्रकारितामा सक्रिय छन् ।
अधिकारी मूलतः राजनीतिक तथा संसदीय रिपोर्टिङमा परिचित छन् । उनी प्रेस काउन्सिल नेपालका सदस्यसमेत थिए ।
गत वैशाखमा सार्वजनिक पदाधिकारी पदमुक्तिसम्बन्धी अध्यादेश, २०८३ लागू भएपछि काउन्सिलका अध्यक्षसहित अन्य सदस्यसँगै उनी पनि स्वतः पदमुक्त भएका थिए ।
अघिल्लो कार्यकालमा उनी नेपाल पत्रकार महासंघको प्रतिष्ठान प्रदेशमा उनी अध्यक्ष थिए ।
