सोसल नेटवर्किङ साइटमा फेसबुकमा मंङ्गलबार विश्वभर समस्या देखिएको छ । प्रयोगकर्ताहरूका फेसबुक एकाउन्ट अटोमेटिक लगआउट भएका छन् । फेसबुकसँगै म्यासेन्जर र इन्स्टाग्राममा पनि समस्या आएको छ ।
अन्तर्राष्ट्रिय मिडियाहरूमा फेसबुकर उसका अन्य प्लेटफर्महरूमा समस्या आएकोबारे हेडलाइन बनेका छन् ।
ब्रिटिस मिडिया डेलिमेलले फेसबुकको माउ कम्पनी मेटास्थित स्रोतलाई उद्धृत गर्दै फेसबुकको आन्तरिक प्रणाली पनि डाउन भएको उल्लेख गरेको छ । जसका कारण मङ्गलबार फेसबुक र यसका अन्य उत्पादनमा समस्या आएको हुन सक्ने समाचारमा जनाइएको छ ।
फेसबुकमा आएका समस्याहरू बारे डाउनडिटेक्टरमा आएका रिपोर्टहरू ।
इन्डियाटिभीले इन्स्टाग्राममा फिड रिफ्रेस नभएको, त कतिका स्टोरी र कमेन्टहरू लोड नभएको उल्लेख गरेको छ । मेटाको अर्को उत्पादन थ्रेडमा पनि समस्या देखिएको समाचारमा जनाइएको छ ।
इन्टरनेट सर्भिस आउटेज (इन्टरनेट सेवा अवरुद्ध हुनु) मापन गर्ने वेबसाइट डाउनडिटेक्टरले फेसबुकको सेवा अवरुद्ध भएकोबारे तीन लाख भन्दा बढी रिपोर्ट भएको जनाएको छ ।
"हामीलाई थाहा छ, मानिसहरूलाई हाम्रा सेवाहरूको पहुँचमा समस्या परेको छ", मेटाका प्रवक्ताले एक्समा लेखेका छन्, "हामी अहिले त्यसैमा काम गरिरहेका छौँ ।"
We're aware people are having trouble accessing our services. We are working on this now.
— Andy Stone (@andymstone) March 5, 2024
फेसबुककै माउ कम्पनीको स्वामित्वमा रहेको म्यासेजिङ एप ह्वाट्सएपमा पनि समस्या देखिएको न्यु योर्क टाइम्सले जनाएको छ ।
समाचार संस्था रोयटर्सले पहिलेको ट्विटर अर्थात् X मा फेसबुक लगायत मेटाका प्लेटफर्म डाउन भएको विषय ट्रेन्डिङ भएको समाचार बनाएको छ ।
फेसबुक लगइनमा आएको समस्या समाधानमा आफ्ना इन्जिनियरहरू लागिरहेको फेसबुकको प्रतिक्रियालाई बीबीसीले समाचार बनाएको छ ।
अहिले भने फेसबुक र यसका अरु उत्पादन सुचारु भइसकेका छन् ।
