नेपाल पत्रकार महासंघको असोज १२ गते तोकिएको निर्वाचनका लागि प्रकाशित सदस्यता नामावलीमा आपत्ति जनाउने जिल्ला अध्यक्षहरूको संख्या ५२ पुगेको छ ।

३२ जिल्लाका अध्यक्षहरूले आइतबार नै संयुक्त विज्ञप्ति निकालेर सदस्यता नामावलीमा अनियमिता भएको आरोप लगाएका थिए । 

५२ जिल्लाका अध्यक्षहरूले भदौ २९ गते प्रकाशित नामावलीमा अनियमितता र विधान विपरीतका कार्यहरू भएको आरोप लगाएका छन् ।

जिल्ला अध्यक्षहरूले केन्द्रीय अध्यक्ष विपुल पोखरेललाई सदस्यताकै बहानामा राजीनामा दिन बाध्य पारिएको आरोप लगाएका छन् । राजीनामा स्वीकृत गरी उनकै हस्ताक्षरसहितको नामावली प्रकाशन गर्नु महासंघको विधिविधान विपरीत भएको उनीहरूको तर्क छ । 

महासंघको विधान अनुसार सदस्यता वितरण र नवीकरण प्रक्रियामा शाखाको सिफारिस, प्रदेशको अनुमोदन र केन्द्रको अभिलेखीकरण हुनुपर्ने व्यवस्था रहेकोमा सो प्रक्रिया पालना नगरी नामावली प्रकाशन गरिएको उनीहरूको भनाई छ । 

यस्तै, पछिल्लोपटक सार्वजनिक गरिएको सदस्यता नामावलीमा थप भएका सदस्यहरूको नाम महासंघ केन्द्र आफैंले जारी गरेको सदस्यता शुद्धिकरण मापदण्ड २०७९ को विपरीत रहेको उनीहरूको दाबी छ।

जिल्ला शाखाको निर्णयलाई पूरै बेवास्ता गरेर केन्द्रबाट विधान र शुद्धिकरण मापदण्ड विपरीत पटक-पटक नाम थपिएको उनीहरूको आरोप छ । 

अध्यक्षहरूले सदस्यता नामावलीमा गरिएको अनियमितता नसच्याएसम्म जिल्ला स्तरमा निर्वाचन प्रक्रिया अघि नबढाउने चेतावनी दिएका छन्। साथै, समस्या समाधानका लागि जिल्ला र प्रदेश अध्यक्षहरूको राष्ट्रिय भेला बोलाउन उनीहरूले सुझाव दिएका छन् ।

समाजवादी प्रेस संगठनको पनि आपत्ति

त्यस्तै समाजवादी प्रेस संगठनले पनि नामावलीप्रति आपत्ति जनाएको छ । सोमबार संगठनका महासचिव रामकुमार एलनले विज्ञप्ति जारी गर्दै गलत नियतका साथ नामहरु हटाउने र थप्ने काम भएको आरोप लगाएका छन् ।

"हालै आएको सदस्यता विवरणमा फेरि पनि विगतमा झैं गलत नियतका साथ नामहरु हटाउने र थप्ने काम भएको छ," जारी विज्ञप्तिमा भनिएको छ, "शुद्धीकरणलाई ‘स्वार्थकरण’ गर्दै पत्रकार महासंघको इतिहास, गरिमा र आदर्शमाथि नै प्रहार गर्ने काम हुँदै आएको छ ।"

महासंघको नयाँ नेतृत्व चयनका लागि चुनाव हुन नसकेर विवाद बढिरहेका बेला भदौ २४ गते अध्यक्ष पोखरेलले राजीनामा दिएपछि वरिष्ठ उपाध्यक्ष रमेश विष्टले महासंघको कार्यबाहक अध्यक्षको जिम्मेवारी सम्हालेका छन् ।

जबरजस्ती निर्वाचन प्रक्रिया अघि बढाइए कानुनी उपचारमा जाने चेतावनी उनीहरूले दिएका छन् । पटक पटक मिति घोषणा गर्दा पनि समयमै निर्वाचन गर्न नसकेको महासंघले शनिबार पुन:निर्वाचन कार्यतालिका सार्वजनिक गरेको छ ।

यस्तो छ ५२ जिल्लाको संयुक्त विज्ञप्ति