नेपाल पत्रकार महासंघको अध्यक्षमा निर्मला शर्मा निर्वाचित भएकी छन् । शर्मा महासंघको इतिहासमै अध्यक्ष पदमा निर्वाचित हुने पहिलो महिला हुन् ।
आइतबार राति केन्द्रीय निर्वाचन समितिले सार्वजनिक गरेको मतपरिणाम अनुसार शर्माले ४,२८२ मत प्राप्त गर्दै ऐतिहासिक जित हासिल गरेकी हुन् ।
शर्मा सत्तारुढ दुई ठूला दल नेपाली कांग्रेस र नेकपा एमाले निकट पत्रकारका संगठन नेपाल प्रेस युनियन र प्रेस चौतारी नेपालको संयुक्त व्यावसायिक प्यानलबाट उम्मेदवार बनेकी थिइन् । उनका निकटतम प्रतिस्पर्धी रमेश विष्टले ३,२०३ मत प्राप्त गरे । त्यस्तै अध्यक्ष पदका अन्य उम्मेदवारहरू देवीप्रसाद सापकोटाले २७० र लालसिंह लामाले ९६ मत प्राप्त गरे । प्रेस युनियनका बागी उम्मेदवार विष्टलाई प्रतिपक्षी नेकपा माओवादी केन्द्र निकट प्रेस सेन्टर नेपालसहितका संगठनको समर्थन थियो ।
वरिष्ठ उपाध्यक्षमा शर्मा प्यानलका दीपक आचार्यले ४ हजार २३० मत प्राप्त गरी निर्वाचित भएका छन् । उनका प्रतिस्पर्धी विष्ट प्यानलका रोसन पुरीले २ हजार ८८६ मत प्राप्त गरे । उम्मेदवारी निष्कृय बनाएर पुरीलाई समर्थन गरे पनि गोविन्द प्रसाद चौलागाईले ५४८ मत प्राप्त गरे ।
उपाध्यक्ष महिलामा शर्मा प्यानलकी नितु पण्डितले ४ हजार ७०५ मत प्राप्त गरी विजयी हुँदा विष्ट प्यानलकी गंगा पौडेल बरालले २ हजार ६४४ मत प्राप्त गरिन् ।
मतपरिणाम घोषणापछि महासंघ केन्द्रीय कार्यालयमा विजेताहरू ।
उपाध्यक्ष समावेशीमा शर्मा प्यानलका उमिदप्रसाद बागचन्दले ४ हजार २९२ मत प्राप्त गरी विजयी भए । उनका निकटतम प्रतिस्पर्धी विष्ट प्यानलका सुभाषप्रसाद साहले २ हजार ८० मत प्राप्त गरे । यसैगरी मोहन कुमार सिंहले ८६० मत पाए ।
महासचिवमा शर्मा प्यानलका रामप्रसाद दाहाल निर्वाचित भएका छन् । उनले ४ हजार ८४ मत प्राप्त गरे । उनका निकटतम
प्रतिस्पर्धी विष्ट प्यानलका लेखनाथ न्यौपानेले १ हजार ९२९ मत प्राप्त गरे । महासचिवका अर्का उम्मेदवार जन्मदेव जैशीले १ हजार १५८ र प्रकाश थापाले ४८८ मत पाए ।
सचिव खुलामा रमेश खतिवडाले ३ हजार ४०० मत प्राप्त गरी विजयी भए । त्यस्तै उत्तरसिंह विष्टले २ हजार ६७, बालकृष्ण अधिकारीले ७७५, माधव दुलालले ७१९ र कुमार ओझाले ३१६ मत पाए ।
सचिव महिलामा सोनी शर्माले ४ हजार ३४७ मत प्राप्त गरी विजयी भइन् । उनका प्रतिद्वन्द्वी सरिता बराइलीले २ हजार ८२३ मत पाइन् ।
त्यस्तै कोषाध्यक्षमा रामकृष्ण अधिकारी निर्वाचित भएका छन् । अधिकारी प्रेस सेन्टरसहित ६ संगठनका संयुक्त प्यानलका उम्मेदवार हुन् । उनि अन्य पधादिकारी भन्दा फरक प्यानलका उम्मेदवार हुन् ।
अधिकारीले रमेश विष्टको प्यानलबाट उम्मेदवारी दिएका थिए । अधिकारीले ३ हजार ८ सय ४७ मत पाएका छन् । उनका प्रतिस्पर्धी रामकृष्ण ज्ञवालीले ३ हजार ४ सय ६४ मत पाए ।
सदस्यता विवाद लगायतका विषयले ६ महिनादेखि पटक पटक तोकिएका चुनावहरू स्थगित भएका थिए । महासंघको केन्द्रीय समितिमा १२ जना पदाधिकारीसहित ५२ पद हुन्छन् ।
महासंघमा रचियो इतिहास
अध्यक्षमा निर्वाचित शर्माले यसअघि पनि महासंघको निर्वाचनमा अध्यक्ष पदका लागि उम्मेदवारी दिएकी थिइन् । तर, सो समय उनी प्रेस युनियन र सेन्टरका उम्मेदवार विपुल पोखरेलसँग पराजित भएकी थिइन् । यसपटक भने उनलाई नेपाल प्रेस युनियन र प्रेस चौतारी दुबैको समर्थन प्राप्त भएपछि चुनावी मैदानमा बलियो उपस्थिति देखाएकी थिइन् । यसले गर्दा शर्माको जित सुनिश्चित भएको अनुमान पहिले नै गरिएको थियो ।
निर्मला शर्माले महिला पत्रकारहरूको हकहितका लागि लामो समयदेखि काम गर्दै आएकी छन् । उनी प्रेस स्वतन्त्रता, पत्रकारहरूको पेशागत सुरक्षाका मुद्दाहरूमा पनि क्रियाशील छिन् ।
६८ वर्ष पुरानो संस्थाको नेतृत्वमा पहिलो पटक अध्यक्षमा पत्रकार महिला निर्वाचित भएकी हुन् । शर्माले आफ्नो कार्यकालमा पत्रकारहरूको पेशागत मर्यादा, सुरक्षा, र महिलाहरूको सहभागिता थप सुनिश्चित गर्नका लागि योजना बनाएर अघि बढ्ने बताएकी छन् ।
महासंघ चुनावमा राजनीतिक समीकरण
सत्तारुढ नेपाली कांग्रेस र नेकपा एमाले निकट पत्रकारका संगठन क्रमशः नेपाल प्रेस युनियन र प्रेस चौतारी नेपालले केन्द्रीय समितिदेखि सबै जसो प्रदेश र जिल्ला शाखाहरूमा संयुक्त उम्मेदावरी दिएका थिए । यी संगठनबाट उठेका बागी उम्मेदवारहरूले प्रतिपक्षी नेकपा माओवादीनिकट प्रेस सेन्टर नेपालसँग गठबन्धन गरेका थिए । कतिपय पत्रकारहरूले कुनै पनि गठबन्धनमा नरहीकनै उम्मेदवारी दिएका थिए ।
केन्द्रीय समितिका ५२ पदमा अध्यक्षसहित पदमा सत्तारुढ दलनिकट गठबन्धनले पद जितेको छ । विष्ट प्यानलले कोषाध्यक्षसहित पाँच केन्द्रीय सदस्य पदमा जित प्राप्त गरेको छ ।
सत्तारुढ दलनिकट ठूला संगठनविरुद्ध लडेको विष्ट प्यानलले एक पदाधिकारी, पाँच केन्द्रीय सदस्य सहित प्रदेश र जिल्लामा पनि बलियो उपस्थिति देखाएको छ ।
पढ्नुस् कसले कति मत पाएः
