नेपाल पत्रकार महासंघ केन्द्रीय समितिको निर्वाचन कार्यतालिका सार्वजनिक गरिएको छ । मंसिर १८ गते मङ्गलबार निर्वाचन कार्यतालिका र मतदाता नामावली प्रकाशन गरिएको हो ।
सार्वजनिक कार्यतालिका अनुसार उम्मेदवारको मनोनयनपत्र दर्ता मंसिर २१ गते बिहान ११ बजेदेखि अपराह्न ४ बजेसम्म हुने छ भने सोही दिन अपराह्न ४ बजे उम्मेदवारको नामावली प्रकाशन गरिने छ ।
उम्मेदवार उपरको दाबी विरोध मंसिर २१ गते अपराह्न ४ बजेदेखि साँझ ७ बजेसम्म रहने छ । मंसिर २२ गते बिहान १० बजेसम्म उम्मेदवारले मनोनयनपत्र फिर्ता लिन सक्नेछन् । सोही दिन बिहान ११ बजे उम्मेदवारको अन्तिम नामावली प्रकाशन गरिने छ ।
मतदान मंसिर २८ गते बिहान १० बजेदेखि अपराह्न ४ बजेसम्म हुने छ। मतगणना मतदानको लागि तोकिएको समय समाप्त भएपछि गरिने छ ।
प्रदेश समितिको मनोनयन मिति मंसिर २४ गते तथा जिल्ला शाखा र प्रतिष्ठान शाखाको मंसिर २६ गते मनोनयन दर्ता गर्ने व्यवस्था मिलाइएको छ।
यसअघि चार पटक मिति तोकेर स्थगित भएको महासंघको चुनाव दलीय पत्रकारका संगठनको दबाबप्रभावले अनिश्चित बनेको थियो ।
गत वैशाख २१ र २२ मा काठमाडौंमा नेपाल पत्रकार महासंघको २७ औँ महाधिवेशनले जेठ २६ गते महासंघको निर्वाचन गर्ने घोषणा गरेको थियो । त्यसपछि निर्वाचन समितिले असार ७ गते एक निर्वाचन तालिका सार्वजनिक गर्दै असार २२ मा निर्वाचन हुने आश्वासन दियो तर उक्त मितिमा निर्वाचन हुन सकेन ।
पढ्नुस्: नेपाल पत्रकार महासंघको चुनाव किन हुन सकेन ?
त्यस्तै असोज ५ गते निर्वाचन गर्ने भन्दै तत्कालिन अध्यक्ष विपुल पोखरेललले निर्वाचन समितिलाई पत्राचार गरेका थिए । तर तेस्रो पटक पनि निर्वाचन हुन सकेन र अध्यक्ष पोखरेलले पदबाट राजीनामा दिए ।
सदस्यता विवाद टुङ्ग्याउन नसक्दा अन्योलमा रहेको महासंघको निर्वाचन वरिष्ठ अध्यक्ष रमेश विष्टले कार्यवाहक अध्यक्ष सम्हालेसँगै चौथो पटक असोज १२ गते निर्वाचन तोकियो । तर उनले पनि तोकिएकै समयमा निर्वाचन गराउन सकेनन् । उनले पनि राजीनामा दिएपछि हाल उपाध्यक्ष बाला अधिकारीले कार्यबाहक अध्यक्ष सम्हालेकी छन् ।
असोज तेस्रो साता भक्तपुरमा भएको महासंघका जिल्ला शाखा र प्रदेश अध्यक्षहरूको भेलाले सदस्यता विवादका कारण पटक-पटक स्थगित हुँदै आएको निर्वाचनको नयाँ मिति तय गरेको थियो ।
पढ्नुस्ः जिल्ला र प्रदेश अध्यक्षहरूको हस्तक्षेपले जोगाएको पत्रकार महासंघको ‘डिएनए’
यस्तो छ निर्वाचन कार्यतालिका:-
