राजावादीहरूको प्रदर्शनको रिपोर्टिङका क्रममा एक पत्रकारको प्रदर्शनकारीहरूले गरेको आगजनीमा परेर मृत्यु भएको छ । शुक्रबार काठमाडौंको तीनकुनेमा राजावादीहरूले गरेको आन्दोनलको रिपोर्टिङ गर्न गएका एभिन्यूज टेलिभिजन पत्रकार सुरेश रजकको मृत्यु भएको हो ।
आगो लगाएको उक्त भवनमा जिउँदै जलेर रजकको मृत्यु भएको एभिन्यूज टेलिभिजनका सम्पादक शिव दाहाले पुष्टि गरे । "दिउँसो २ बजेदेखि सम्पर्कविहीन हुनुहुन्थ्यो । हामी खोज्दै थियौँ," सम्पादक दाहालले मिडिया कुराकानीसँग भने, "अघि भर्खरै एउटा शव भेटियो भन्ने खबर आएपछि टेलिभिजनका अध्यक्ष भास्कर राजकर्णिकारसहित पुगेका थियौँ । जलेको अवस्थामा भेटिएको शव उहाँकै हो भन्ने पुष्टि भयो ।"
"राजावादीहरूको आन्दोलनको रिपोर्टिङ गर्नका लागि एभिन्यूजबाट ७ जना पत्रकारहरु गएका थियौँ । उहाँ त्यही घरमा बसेर रिपोर्टिङ गर्दै हुनुहुन्थ्यो । ६ जना फर्किनुभयो, रजकजी फर्कनुभएन", उनीसँगै रिपोर्टिङमा गएका एक पत्रकारले भने ।
राजावादीका नाममा भएको प्रदर्शनकारीको अराजक भिडले यो घरमा पहिला ढुंगामुढा गरेको थियो । र, पछि आगो लगाएको थियो । सुरेश रजक यही घरभित्र वा छतमा फोटो-भिडियो खिच्न पुगेका थिए ।
एभिन्युज टेलिभिजनका सम्पादक शिव दाहालले अनलाइनखबरसँग भनेका छन्, ‘रिपोर्टिङमा गएको साथी सम्पर्कविहीन हुनुहुन्छ । अस्पतालतिर पनि भएको जानकारी छैन ।’
त्यसको उनको आगलागी भएकै घरमा मृत्युभएको उनीसँगै रिपोर्टिङ गरिरहेका पत्रकार विक्रम श्रेष्ठले समाजिक सञ्जालमा लेखेका छन् ।
प्रदर्शनकारीहरूले सञ्चारमाध्यमका कार्यालयहरूमा पनि आक्रमण गरेका छन् । प्रदर्शन उग्र बन्दै जाँदा प्रदर्शनकारीहरूले अन्नपूर्ण पोस्ट दैनिकको तीनकुनेस्थित कार्यालयमा आगजनी गरेको छ भने कान्तिपुर टेलिभिजनको कार्यालयमा पनि ढुंगामुढा गरेका थिए ।
