नेपाली कांग्रेसकी सांसद आरजु राणा देउवाले आफ्नो चरित्र हत्या गर्ने मनासयले सामाचार प्रकाशित गरेको भन्दै प्रेस काउन्सिल नेपालमा उजुरी दिएकी छन् । सांसद देउवाले आफ्ना स्वकीय सचिव कमल रावल मार्फत प्रेस काउन्सिलमा असार १७ गते उजुरी दिएकी हुन् ।
देउवाले टिभी र केही युट्युब सहित ९ वटा सञ्चार संस्थाविरूद्ध उजुरी गरेकी हुन् । उनले योहो, सगरमाथा, न्युज २४, प्राइम टाइम्स र कान्तिपुर टिभी विरुद्ध उजुरी गरेकी छन्। त्यस्तै एकता टिभी नेपाल, नेपाल खबर टिभी, खोजनीति खबर र कलर अफ नेपाल नामक युट्युब च्यानललाई पनि कारबाही गर्न उनले माग गरेकी छन् । उनले उजुरीमा आफ्नाबारे बनेका सामग्रीका भिडियो लिङ्क पनि समावेश गरेकी छन् ।
नक्कली भुटानी शरणार्थी प्रकरणका फरार अभियुक्त बेचन झा पक्राउ परेपछि सांसद देउवाको नाम जोडेर कतिपय सञ्चार माध्यमहरूले समाचार सम्प्रेषण गरेका थिए ।
नेपाली नागरिकलाई नक्कली भुटानी शरणार्थी बनाएर अमेरिका लैजान रचिएको अपराधमा बेचन झाले बिचौलिया भूमिका निर्वाह गरेको आरोप छ । उनी पक्राउ परेपछि पूर्व प्रधानमन्त्री एवं नेपाली कांग्रेसका सभापति शेरबहादुर देउवाकी पत्नीसमेत रहेकी आरजु देउवाको नाम पनि जोडेर समाचारहरू प्रकाशित भएका थिए ।
आफूबारे भ्रामक समाचार प्रकाशन गर्ने सञ्चार संस्थाका सम्पादक, प्रकाशक र समाचार तयार गर्ने सञ्चारकर्मीहरूलाई कानुन अनुसार कारवाही गर्न उनले माग गरेकी छन् । उजुरीमा ती समाचार हटाउन निर्देशन दिन पनि माग गरिएको छ ।
