पाँच दिनअघि धनुषा जिल्लाको जनकपुरधाम उपमहानगरपालिका २० मा एकजना स्थानीयबासी माथि खुकुरी प्रहार भयो । लेनदेन विवादका कारण खुकुरी प्रहार गर्दा घाइते भएको पक्षले जिल्ला प्रहरी कार्यालय धनुषामा जाहेरी दर्ता गर्न खोजे ।
तर प्रहरीले जाहेरी लिए । प्रहरीले जाहेरी नलिएपछि पीडित पक्ष बिहीबार प्रहरी कार्यालयअगाडि प्रदर्शनमा उत्रिएका थिए। त्यहीँ रिपोर्टिङ गर्न पुगेका थिए, नयाँ पत्रिका दैनिकका धनुषा सम्वाददाता हदिश खुद्दार ।
प्रदर्शन भइरहँदा खुद्दार मोबाइलबाट फोटो खिच्दै थिए । फोटो खिचिरहेका बेला उनको मोबाइल अचानक प्रहरीले खोस्यो । "म नाराबाजीको फोटो खिच्न खोज्दै थिएँ", खुद्दारले मिडिया कुराकानीसँग भने,"अचानक त्यहाँ सुरक्षामा खटिएका प्रहरीले मेरो फोन खोस्यो ।"
रिपोर्टिङका क्रममा मोबाइल खोसिएपछि खुद्दारले प्रतिकार गरे । "मेरो मोबाइल किन थुतेको ? भनेर प्रहरीलाई प्रश्न गरेँ, " खुद्दारले सुनाए, "त्यसपछि इन्सपेक्टर राम विनय सिंहले मोबाइल फिर्ता दिए ।"
फोन फिर्ता भएपछि खुद्दार पुन: रिपोर्टिङमा लागे । उनी पीडितहरूसँग कुराकानी गर्न थाले । उनी प्रदर्शनमा रहेका पीडितहरुसँग कुरा गर्दै थिए । प्रदर्शनमा उत्रिएकाहरूमाथि प्रहरीले लाठी चार्ज गर्न थाले । "भुईँमा थचक्क बसेर पीडितसँग कुरा गर्दै थिएँ । प्रहरीले अचानक लाठी चार्ज गर्न थाल्यो, मसँगै कुरा गरिराख्नुभएका पीडितमाथि पनि लाठी प्रहार भयो र उहाँ त्यहाँबाट भाग्नुभयो " उनले भने, "त्यसपछि म त्यहाँबाट अलि पर पुगेर भिडियो कैद गर्न गर्दै थिएँ, प्रहरीले फेरि मेरो मोबाइल खोस्यो ।"
प्रहरीले भिडियो कैद गरिरहेका पत्रकार खुद्दारको मोबाइल मात्रै खोसेनन् । उनीमाथि हातपात पनि गरे । "भिडियो खिच्दै थिएँ, किन खिचेको भन्दै मोबाइल खोसे, त्यसपछि म माथि हातपात गर्न थाले । लछारपछार गरेर प्रहरी कार्यालयमा पुर्याए ।" प्रहरीले उनलाई लछारपछारसँगै थुनिदिने धम्की समेत दिएका थिए ।
"मेरो हातबाट इन्सपेक्टर नवराज खड्काको नेतृत्वमा फोन खोसे र उनि मलाई थुन्न पर्छ भन्दै बुरुक बुरुक भएका थिए ।", पत्रकार खुद्दरले भने ।
उहाँ पत्रकार हो भन्ने थाहाँ थिएन: प्रहरी
जिल्ला प्रहरी कार्यालय धनुषाले खुद्दार पत्रकार हुन् भन्ने थाहा नभएका कारण मोबाइल खोसेको भन्दै आफ्नो बचाउ गरेको छ । जिल्ला प्रहरी कार्यालय धनुषाका प्रहरी नायव उपरीक्षक (डिएसपी) रञ्जन अवाले पत्रकार हो भन्ने थाहा नभएका कारणले खुद्दारको मोबाइल खोसेको बताए । "भिडभाड थियो, उहाँ पत्रकार हो भन्ने थाहा पाएनौँ, सिभिल होला भनेर मोबाइल खोसेको हो",डिएसपी आवले मिडिया कुराकानीसँग भने, "उहाँ पत्रकार हो भन्ने थाहा पाएपछि हामीले उहाँको मोबाइल फिर्ता दियौँ ।"
"उहाँलाई लछारपछार गरेर चौकी पुर्याएर थुन्ने धम्की दिनुभएको हो ?' मिडिया कुराकानीको प्रश्नमा डिएसपी आवले प्रतिप्रश्न गरे, "त्यो भिडभाडमा हामीले त्यस्तो गर्यौँ होला जस्तो लाग्छ ? मोबाइल कार्यालयमा ल्याएका हौँ, त्यो पनि पछि फिर्ता गर्यौँ, उहाँमाथि केही भएको छैन ।"
खुद्दार आफू पत्रकार रहेको जानकारी गराउँदा गराउँदै पनि प्रहरी निरीक्षक नवराज खड्काको निर्देशनमा प्रहरी जवान रूपेशकुमार यादवसहितले समातेर जिल्ला प्रहरी कार्यालय पुर्याएको बताउँछन् । तर, पछि प्रहरी निरीक्षक रामविनय सिंहको निर्देशनपछि खुद्दार छुटे ।
घटनापछि पत्रकार महासंघ मधेश प्रदेश अध्यक्ष राजेश कर्णसहितको टोलीले दोषी प्रहरीमाथि कारबाहीको माग गरेका छन् । जिल्ला प्रहरी कार्यालय पुगेका पत्रकारको टोलीले खुद्दारमाथि धरपकड गर्नेलाई कारबाहीको माग गरेका छन् ।
त्यस्तै मिडिया एक्सन नेपालले घटनाको भत्सर्ना गरेको छ । मिडिया एक्सन नेपालका अध्यक्ष लक्ष्मणदत्त पन्तले विज्ञप्ति निकालेर दोषीमाथि कारबाही गर्न र माफी माग्न प्रशासनसँग माग गरेको छ ।
डिएसपी रन्जन अवाले तीन दिनभित्र घटनाको छानबिन गरी दोषीमाथि कारबाही गर्ने लिखित प्रतिबद्धता जनाएका छन् ।
