युथ इननोभेसन ल्याबले भ्रामक/गलत सूचनाको प्रामाणिकता खोजी सम्बन्धमा चार दिने बुटक्याम्प आयोजना गर्दैछ ।
भ्रामक/गलत सूचनाको प्रवाहलाई सामना गर्ने प्रयासमा पत्रकार, स्वतन्त्र रुपमा सामग्री श्रृजना गरिरहेका व्यक्ति, मिडिया उत्साही र नेपालभरका अडियो, भिजुअल, टेक्स्ट वा कुनै पनि माध्यमबाट डिजिटल सामग्री प्रयोग गर्ने विद्यार्थी सहभागी हुन सक्ने आयोजकले जनाएको छ ।
ल्याबले अष्ट्रेलियन सरकारको Direct Aid Program (DAP) को सहयोगमा सञ्चालित "SACHI: Seeking Authenticity by Challenging Mis/Dis Information" परियोजना अन्तर्गत यो बुटक्याम्प आयोजना गरेको हो ।
बुटक्याम्पको वेबसाइटमा नेपालमा बढ्दो गलत सूचना र भ्रामक जानकारीको चुनौतीलाई सम्बोधन गर्ने उद्देश्यले कार्यक्रम आयोजना गरिएको उल्लेख छ ।
चार दिने आवासीय बुटक्याम्पमा सातै प्रदेशका सहभागीहरूलाई समावेश गरिने आयोजकले जनाएको छ । छनोट भएका १० जना सहभागीलाई विस्तारित मेन्टरशिप कार्यक्रम पनि आयोजकले उपलब्ध गराउने छ । आयोजकले सहभागीहरूका लागि खाना, बास र स्थानीय यातायात लगायतका सम्पूर्ण खर्च निःशुल्क उपलब्ध गराउनेछ ।
बुटक्याम्पको मुख्य उद्देश्य नेपालको विकसित मिडिया परिदृश्यमा गलत सूचना र भ्रामक जानकारीले उत्पन्न गरेका समस्याहरूलाई सम्बोधन गर्नु रहेको जनाइएको छ । कार्यक्रममा विशेष गरी सीमान्तकृत र अल्पसंख्यक समुदायहरूलाई लक्षित गरिएको जनाइएको छ ।
यो कार्यक्रममा १८ वर्ष वा सोभन्दा माथिको नेपाली नागरिक सहभागी हुन सक्छन् । पत्रकार, स्वतन्त्र सामग्री निर्माता (कन्टेन्ट क्रियटर), मिडियामा रुचीराख्ने व्यक्ति वा डिजिटल सामग्री प्रयोग गर्ने विद्यार्थीहरू सहभागी हुन सक्छन् ।
यसबाहेक यो कार्यक्रममा सहभागी हुनका लागि मिडिया, सञ्चार, र डिजिटल प्लेटफर्महरूको राम्रो ज्ञान भएको हुनुपर्छ । साथै, नेपाली वा अंग्रेजी भाषामा उत्कृष्ट संवाद क्षमता चाहिन्छ।
इच्छुक उम्मेदवारहरूले २७ अक्टोबर २०२४ (११ कार्तिक २०८१) बुधबार रातको ११:५९ बजेसम्म अनलाइन आवेदन फारम भर्न सक्नेछन् । छनोट समितिले सबै आवेदनहरूको अध्ययन गरी अन्तिम ३० सहभागी छनोट गर्नेछ।
