बारबरा फाउन्डेसनले चारवटा पत्रकारिता फेलोसिप घोषणा गरेको छ । फाउन्डेसनले दुई लाख ५० हजार रुपैयाँका दरले चार वटा विषयगत पत्रकारिता फेलोसिपको घोषणा गरेको हो ।
२०८० चैत मसान्तभित्र तोकिएको विषयमा रिपोर्टिङ गर्ने पत्रकारहरूलाई कूल १० लाख रुपैयाँ बराबरको फेलोसिप दिन लागिएको हो । भ्रष्टाचारमा शून्य सहनशीलता र सुशासनयुक्त विधिको राज्यका पक्षमा खबरदारी गर्न खोजमूलक समाचार सामग्री उत्पादन गर्ने पत्रकारका लागि फेलोसिप घोषणा गरेको फाउन्डेसनका सदस्य प्रा.डा. गोविन्दराज पोख्रेलले जानकारी दिए ।
पत्रकार साथिहरुलाई सुचना !!! pic.twitter.com/qXSru7Se4T
— Govind Raj Pokharel 🇳🇵 (@grpokharel) August 17, 2023
फेलोसिपका लागि सुशासन र भ्रष्टाचार, वातावरणीय परिवर्तनको मुद्दा, स्वास्थ्य र शिक्षा सरोकारका विषयमा प्रस्ताव पेश गर्नुपर्ने छ । आवेदकले भदौ मसान्तसम्म प्रस्ताव पेश गर्नुपर्ने छ । असोज पहिलो साताभित्र प्रस्ताव स्वीकृतिको सूचना निकालिने छ ।
प्रस्ताव स्वीकृत भएपछि २०८० चैत मसान्तभित्र तोकिएको विषयमा शोध वा अनुसन्धानमूलक समाचार सामग्री प्रकाशित भैसकेको हुनुपर्नेछ ।
फेलोसिपको लागि फाउन्डेसनको कार्यालय वा [email protected] मार्फत आवेदन दिन सकिन्छ ।
खोजमूलक पत्रकारिता पुरस्कार २०८१ को लागि आवेदन माग
बारबरा फाउन्डेसनले खोजमूलक पत्रकारिता पुरस्कार २०८१ का लागि पनि आवेदन माग गरेको छ । हरेक दुई वर्षमा प्रदान गरिने पुरस्कारको राशि २५ लाख रुपैयाँ रहेको छ ।
घोषणाअनुसार अनुसन्धानमूलक पत्रकारिताका लागि १५ लाख, ७ लाख र ३ लाख रुपैयाँका अलगअलग पुरस्कारहरू प्रदान गरिने छ ।
पुरस्कारमा जोडिएको मुद्दाले नेपालको सामाजिक, आर्थिक वा राज्य संयन्त्रमै परिवर्तन ल्याउन सक्ने वा प्रभाव देखाउन सक्ने तहको सान्दर्भिक शोध/खोजलाई प्रश्रय दिएको हुनुपर्ने फाउन्डेसनका महासचिव मोहना अन्सारीद्वारा जारी विज्ञप्तिमा जनाइएको छ ।
पत्रकारिता जगतले सिंगो राज्य पद्धतिमा सुशासनको खोजी गर्न र नियम–कानुनको थिति बसाल्न पुर्याउँदै आएको भूमिकाको सम्मान गर्न विशिष्ट पुरस्कारको थालनी गरिएको फाउन्डेसनले जनाएको छ ।
प्रतिष्पर्धामा आउने सामग्री पत्रपत्रिका, टेलिभिजन, रेडियो, पडकास्ट वा डिजिटल पोर्टलमा प्रकाशित/प्रसारित भएको हुनपर्ने छ । यस्ता सामग्रीबारेको आवेदन प्रकाशक, पत्रकार, दर्शक, स्रोता वा पाठक जोजसले दिए पनि स्वीकार्य हुने विज्ञप्तिमा उल्लेख छ । तर आवेदकको परिचय स्पष्ट रुपमा खुल्नुपर्ने छ । प्रतिष्पर्धाका लागि आवेदन २०८० चैत मसान्तभित्र आइसक्नुपर्ने फाउन्डेसनले जनाएको छ ।
यसपटक बैशाख २०७९ देखि चैत २०८० (२४ महिना) सम्म प्रकाशन/प्रसारण भएका अनुसन्धानमूलक समाचार/सामग्रीले प्रतिष्पर्धामा स्थान पाउनेछन् ।
फाउन्डेसनले प्रेस स्वतन्त्रता दिवस अर्थात् २०८१ बैशाख २१ गते (मे ३) खोजमूलक पत्रकारिता पुरस्कार २०८१ प्रदान गर्ने छ ।
खोजमूलक पत्रकारिता पुरस्कार २०८१ को लागि आवेदकले फाउन्डेसनको बालुवाटारस्थित कार्यालय वा इमेल [email protected] मार्फत वा संस्थाको वेवसाइटमा रहेको फारम भरेर आवेदन दिन सकिन्छ ।
२०६७ सालदेखि नेपालको सामाजिक–सांस्कृतिक तथा वातावरणीय क्षेत्रमा क्रियाशील बारबरा फाउन्डेसन पत्रकार तथा सामाजिक अभियन्ता बारबरा एडम्सको पहलमा स्थापित संस्था हो ।
सन् १९६० मा बेलायती महारानी एलिजाबेथको नेपाल भ्रमणका क्रममा रिपोर्टिङका लागि नेपाल आएकी उनी त्यसपछि नेपालमै बसिन् । उनले २०६५ सालमा नेपाली नागरिकता प्राप्त गरेकी थिइन् । उनको २०७३ सालमा निधन भएको थियो ।
